“Жанұя” отбасын қолдау орталығы мен “Белсенді ұзақ өмір сүру” орталығының мамандары Қабанбай ауылдық округіндегі тұрғындар жиі жиналатын қоғамдық орындарда ақпараттық-түсіндіру жұмыстарын жүргізді.

Шара барысында ауыл азаматтарына орталықтардың қызмет бағыттары мен көрсетілетін қолдау түрлері таныстырылып, 100-ге жуық ақпараттық парақшалар таратылды.

“Жанұя” отбасын қолдау орталығы – өмірлік қиын жағдайға тап болған азаматтарға әлеуметтік, психологиялық және құқықтық көмек көрсететін мекеме. Мұнда отбасылық қатынастарға қатысты кеңес алу, тұрмыстық зорлық-зомбылықтың алдын алу, құжат рәсімдеу және жұмыспен қамту сынды өзекті мәселелер бойынша қолдау көрсетіледі.

“Белсенді ұзақ өмір сүру” орталығы – зейнет жасындағы азаматтарға арналған демалыс және дамуға бағытталған кеңістік. Мұнда егде жастағылар бос уақытын тиімді өткізіп, денсаулығын нығайтып, түрлі үйірмелер мен кездесулерге қатысу арқылы белсенді өмір салтын жалғастыра алады.